മഞ്ഞകസവണി ഞൊറിയുടുത്ത്,
പൊന്‍ കണിക്കൊന്നകള്‍ പൂത്തുലഞ്ഞു.,
ഹൃദയാങ്കണത്തിലും പൊന്നൊളിയായ്,
പൊന്‍വിഷു പുലരിയുദിച്ചിടുന്നു.
മഞ്ഞള്‍ നിറമോലും പൂങ്കുലയില്‍,
തുള്ളികളിച്ചിടും പൂമൊട്ടുകള്‍.,
കണ്ണന്റെ പൊന്നരഞ്ഞാണത്തിലെ,
കിങ്ങിണി പൊന്‍മണി മുത്ത്‌ പോലെ.
ആകാശത്തമ്പിളിവെട്ടത്തിലായ്,
താരാഗണങ്ങളേപോലെയാവാന്‍.,
മേടമാസ പാല്‍നിലാവ് കൊള്ളാന്‍,
മോഹിച്ച മോഹങ്ങളാരു കാണാന്‍.
മൃദു ശാഖ തല്ലി കൊഴിച്ചു കൊണ്ട്,
വാണിഭ കെട്ടുകളാക്കി മാറ്റി,
വിലയിട്ടു വിലപേശി വിറ്റിടുന്നു,
വാസന്ത മന്ദസ്മിതങ്ങളെല്ലാം.
എങ്കിലും പൊന്‍കണിയായി മാറാന്‍,
കര്‍ണികാരം പൂത്തുലഞ്ഞിടുന്നു.,
കണ്ണന്റെ പാദാരവിന്ദങ്ങളില്‍,
ഞെട്ടറ്റു പൊഴിയുവാന്‍ മോഹമോടെ.
മഞ്ഞ കസവണി ഞൊറിയുടുത്ത്,
പൊന്‍ കണിക്കൊന്നകള്‍ പൂത്തുലഞ്ഞു.,
ഹൃദയാങ്കണത്തിലും പൊന്നൊളിയായ്,
പൊന്‍ വിഷു പുലരിയുദിച്ചുവന്നു.
**********
വരുന്ന ഏപ്രില്‍ 14 മേടം 1 നു പുതിയൊരു വിഷുപുലരികൂടി പൊട്ടിവിടരുന്നു
പ്രിയപ്പെട്ട ഏവര്‍ക്കും ഹൃദയം നിറഞ്ഞ വിഷു ആശംസകള്‍ !
സ്നേഹത്തോടെ,
ഗിരീഷ്‌
*************
മഞ്ഞകസവണി ഞൊറിയുടുത്ത്,
വരുന്ന ഏപ്രില്‍ 14 മേടം 1 നു പുതിയൊരു വിഷുപുലരികൂടി പൊട്ടിവിടരുന്നു
പ്രിയപ്പെട്ട ഏവര്‍ക്കും ഹൃദയം നിറഞ്ഞ വിഷു ആശംസകള്‍ !
സ്നേഹത്തോടെ,
ഗിരീഷ്‌
*************
