മതഭ്രാന്ത്‌

മതമൊരു മധുരമാണെങ്കിലും

തെല്ലോന്നതികമായെന്നാല്‍  അതും വിഷമായിടും

തീപ്പൊരിയായിടും  തീനാളമായിടും

ഭുമിതന്‍ പൂങ്കാവനം ചാമ്പലായിടും

സൂക്ഷിച്ചുകൊള്ളണം  മര്‍ത്യമനസ്സെന്ന

കരിമരുന്നതിലൊരു  തീപ്പൊരിവീഴാതെ

വിശ്വാസസംഹിതകള്‍ ഏറെയുണ്ടിവിടെ ഈ

വിശ്വത്തിലെവിടെയും താങ്ങുപോല്‍ തണലുപോല്‍

വിശ്വസിച്ചീടുന്നതപരാധമല്ല

ഈ വിശ്വാസം അതിനൊരു മറ കൊടുത്തീടണം

മൂടിവച്ചീടണം അന്യരതു കാണാതെ

ജനനേന്ത്രിയങ്ങളെ മുടിവയ്ക്കും പോലെ

അന്യന്റെ വിശ്വാസം എത്തി നോക്കീടുവാന്‍

അവകാശമില്ലില്ല ഏതൊരു മര്‍ത്യനും

രഹസ്യമതൊക്കെയും നോക്കി രസിക്കുന്ന-

-തപരാതമല്ലെയോ  വൃത്തികേടല്ലയോ

സത്യത്തിലേക്കങ്ങു നീണ്ടു കിടക്കുന്ന

വഴിമാത്രമായിയീ മതമതു കാണണം

സത്യത്തിലേക്കുള്ള വഴികള്‍ പലതുണ്ട്

വൈരുധ്യമുണ്ടവ തമ്മില്‍ പരസ്‌പരം

പല പല നദികളങ്ങോഴുകിവന്നവസാനം

അലതല്ലുമാ കടലലയോടു ചേരുന്നു

ഒഴുകിവന്നീടുന്ന മണ്ണിന്റെ മാറിലായ്

ഹരിതകം വിരിയിച്ച്  കതിരുകള്‍ വിളയിച്ച്

സര്‍വ്വചരാചര  ദാഹം ശമിപ്പിച്ച്

ശാന്തമായി ശാന്തമായി ഒഴുകിവന്നവസാനം

അസ്ത്തിത്വമെല്ലാം വെടിഞ്ഞു പരസ്പ്പരം

ഇഴചേര്‍ന്ന്  തെരുതെരെ തിരമാല തീര്‍ക്കുവാന്‍

സ്നേഹത്തിന്‍ നിറനിലാവലിയുന്ന പാല്‍കടല്‍

നിറയുവാന്‍ ഒരുതുള്ളി ജലകണമാകുവാന്‍

ഒഴുകണം   നമ്മള്‍തന്‍  നദിയിലൂടങ്ങതിന്‍

ഉറവ തേടേണ്ട നാം സമയം കളയേണ്ട.

               *************