നറുതിരിവെട്ടം

കണ്ണുകളിരുട്ടാല്‍   മറഞ്ഞൊരാ സ്നേഹിത- 

-നെന്നുമെന്‍ കണ്ണുകള്‍ നനയിക്കുമെങ്കിലും 

കണ്ടില്ല കാണിച്ചതില്ലവനാരണ്ടു 

കണ്ണുകളീറനണിഞ്ഞതൊരിക്കലും  

എന്തൊരളവറ്റശാന്തിയാഹൃദയത്തിലെ-

-ന്തൊരാനന്തമാനിറപുഞ്ചിരിക്കെ-

-ന്തൊരാവേശമാഹ്ലാദമാമൊഴികളെ-

ന്തൊരാശ്വാസ മധുരമാസാമിപ്യം  

കണ്ണു തുറന്നു പിടിച്ചാലുമടച്ചാലും 

കണ്‍മുന്നിലെവിടെയുമിരുളലകള്‍മാത്ര-

-മെന്നാലതെന്തൊരു ദുരിതമെന്നൊരുവേള 

ചിന്തിച്ചഞാനെത്ര വിഡ്ഢിയെന്നോര്‍ത്തുപോയ് 

ഹൃദയത്തിലായിരം ആശകള്‍തീര്‍ക്കുമീ 

കാഴ്ച്ചകളൊക്കെയും കണ്ടുമടുത്തിന്നതെ-

-ല്ലാമുറഞ്ഞൊരു നൊമ്പരമാകുമ്പോള്‍ 

കണ്ണടച്ചീടുന്നു ഞാനുമൊരുവേളയെന്‍ 

ഉള്ളിലായ് അണയാതെ എന്നും തെളിയുമാ 

നറുതിരിവെട്ടമൊന്നൊരുനോക്ക് കാണുവാന്‍  

******************