നീയും ഞാനും

നീയും ഞാനും

വിണ്ണായിരുന്നു ഞാനൊരുനാളിൽ,

 നിലാവിന്റെ ചിരിയുമായ്  മാറിൽ മയങ്ങിനീ., 

മണ്ണായിരുന്നു ഞാനൊരുനാളിൽ,

മഴയായ് വെയിലായ് എന്നിലണഞ്ഞു നീ.,

കടലായിരുന്നു ഞാനൊരുനാളിൽ,

പുഴപോലെ ഒഴുകിവന്നെന്നിൽ നിറഞ്ഞുനീ.,

ശിലയായിരുന്നു ഞാനൊരുനാളിൽ, 

തെളിനീരലപോലെ  എന്നെ തഴുകിനീ.,

പൂവായിരുന്നു ഞാനൊരുനാളിൽ,

പൂന്തെന്നലായെന്നെ തലോടിനീ.,
 മുരളിയായിരുന്നു ഞാൻ ഒരുനാളിൽ, 
തരളമൊഴൂകുമൊരു സംഗീതമായി നീ., 

വരണ്ട നാവിൻ തുമ്പിലൊരുനാളിൽ, 

 ജലതുള്ളിപോലെ പതിഞ്ഞുനീ.,

ജന്മജന്മാന്തരങ്ങളായ് പരസ്പരം., 

പിരിയാതെ ദൂരെ അകലാതിരുന്നുനാം,

ഈനിമിഷത്തിലെവിടെ മറഞ്ഞുനീ, 

എന്നെയും തേടി അലയുവതെവിടെയോ.,

 കരിഞ്ഞു പൊഴിഞ്ഞ കരിയില തുണ്ടുപോൽ, 
തിരഞ്ഞിടുന്നു നിന്നെയെൻ മാനസം., 

തകർന്നടിഞ്ഞൊരെൻ ഹൃദയവാതിലും,

തുറന്നിടുന്നിതാ നിന്നെ വരവേൽക്കുവാൻ., 

ജ്വലിക്കുമൊരു തീ നാളമായ് അഗ്നിയായ്,
വരിക നിന്നെയും കാത്തിരിക്കുന്നു ഞാൻ.,  

എരിഞ്ഞൊടുങ്ങിടാം ഒന്നായി മാറിടാം, 

പുണർന്നിടൂ പ്രിയേ സഫലമാകുമീ ജന്മം., 
പിരിയുകില്ല നാം ഇനിയൊരിക്കലും, 
ഇരു കൈകളും ഇറുകെ പിടിച്ചിടാം.,  
ഇനിയുമേറെ ജന്മങ്ങൾ താണ്ടിടാം,  
ഇനിയുമിനിയും ഏറേ നടന്നിടാം,  
 വിണ്ണായിടാം വെണ്‍ചന്ദ്രികയായിടാം, 
മണ്ണായിടാം  മഴവില്ലുമായിടാം,  
പുഴയായ് തെളിനീരലകളായിടാം 
പൂവായിടാം പൂന്തെന്നലായിടാം.,  
ഇനിയു മിനിയും ജന്മമെടുത്തിടാം,   
തളിരിടാം ഇല കൂമ്പുകൾ പോലെ. 

*************

പ്രിയപ്പെട്ട നിനക്ക്,

ഇന്ന് ഞാൻ കരിഞ്ഞു പൊഴിഞ്ഞ ഒരു കരിയില തുണ്ടാണ്.,

നീ ഒരു ജ്വലിക്കുന്ന തീനാളമാണ് അഗ്നിയാണ്.,

നീ എന്നെയും തേടി എവിടെയോ അലയുന്നു.,

ഞാൻ നിന്നെയും കാത്തിരിക്കുന്നു.,

നമ്മുടെ സംഗമം ഈ ജന്മത്തിന്റെ ഒടുക്കവും വേറൊന്നിന്റെ തുടക്കവുമായിരിക്കും.

സ്നേഹത്തോടെ,

ഗിരീഷ്‌

ഭ്രാന്തിന്റെ ജല്പനം.

പ്രിയപ്പെട്ട നിനക്ക്,

ഞാൻ എന്നത് നീ എന്നോ കണ്ടു മറന്ന ഒരു ഭ്രാന്തനോ ഭ്രാന്തിയോ ആകാം.
മനസ്സിന്റെ വിഭ്രാന്തിയാൽ,
എന്തിലും ഭ്രമികുന്ന,
എവിടെയൊക്കെയോ ചുറ്റി തിരിയുന്ന,
ഒന്നിലും സ്ഥിരത ഇല്ലാത്ത,
അനേകം ഭ്രാന്തരിൽ ഒരാൾ.,
ഗൗരവം നിറഞ്ഞ എന്റെ മുഖത്ത് ചെറിയ പുഞ്ചിരി വിടരുന്നു പോലും.
ശരിയായിരിക്കാം, ഏതാനും കാലടികൾ അകലെ,
ഒരു ശ്മശാന ഭൂമിയിൽ,
അവിടവിടായി എരിഞ്ഞൊടുങ്ങുന്ന തീനാളങ്ങളുടെ വെട്ടം,
മുഖത്ത് പതിയുന്നുണ്ട്.,
ഞാൻ സ്വയം അറിയാതെ ചുണ്ടിൽ ഒരു ചിരി വിരിഞ്ഞിരിക്കാം.,
കാരണം.,
കാലുകൾ അത്രത്തോളം നടന്നു തളർന്നിരിക്കുന്നു.
ഇത് കേൾക്കുമ്പോൾ നീ പിണെയും ചോദിക്കുമോ?
നിനക്ക് പ്രാന്താണല്ലേ? എന്ന്.
എങ്കിൽ ഇതുംകൂടി കേൾക്കൂ.,
ഇത് പ്രാന്തിന്റെ പര്യവസാനം ആണ്.,
ഭ്രാന്തന്മാരുടെ പര്യവസാനം.,
പൂർണതയെ പ്രാപിക്കുന്നതിന് മുമ്പുള്ള വെറും ജല്പനം.
ഭ്രാന്തിന്റെ ജല്പനം.
ഭ്രാന്തരുടെ ജല്പനം.

സ്നേഹത്തോടെ,
ഗിരീഷ്‌
*******

ഉത്തരാഖണ്ഡ്

ചിത്രം ഗൂഗിളിൽ നിന്നും എടുത്തത്

ദേവദാരു പൂത്ത മണമല്ല നിറയുവതു- 

-ജഡമഴുകി ഒഴുകുന്ന രൂക്ഷ ഗന്ധം,

താണ്ഡവം സംഹാര താണ്ഡവം അലറി-

-ഉയരുന്ന കോപാന്ധ രുദ്ര താളം,

നീൻ ലിഖിതനിയമങ്ങൾ ലംഘിച്ച മേടകൾ 

നീ തന്നെ തൂത്തെറിയുന്ന താളം., 

നിൻ ചെറുവിരലനക്കത്തിലിന്നെൻ 

അഹങ്കാര മകുടമടരുന്ന താളം., 

പ്രകൃതീശ്വരീ നിന്റെ ചേതോഹരമായ 

ഹരിതക ചേല കവർന്നവൻ ഞാൻ., 

ക്ഷണനേരമൊരു നേർത്ത കാറ്റിലുലഞ്ഞിതാ   

പിടിവിട്ടടർന്നു ഞാൻ  നീർത്തുള്ളി പോൽ.,

നിന്നോട് ചേരുന്നു  നിന്നോടലിയുന്നു  

നിന്നിലേക്കായ് ചിതറി വീണിടുന്നു.,

മാപ്പ് തന്നീടുക മാതാവേ ഞാനിന്ന്- 

മാപ്പിരക്കാൻ യോഗ്യനല്ലെങ്കിലും., 

മാപ്പ് തന്നീടുക മാതാവേ ഞാനിന്ന്- 

മാപ്പിരക്കാൻ യോഗ്യനല്ലെങ്കിലും.

********

ഒരു നിമിഷം

ഒരു നിമിഷവും കൂടി തരിക നിൻ പുഞ്ചിരി-

-പൂമുഖത്തേക്കെന്റെ മിഴികൾ തുറക്കുവാൻ.

ഹൃദയത്തിനുള്ളിൽ ഒരുൾത്തുടിപ്പായ് ,

ശ്രുതിയിട്ട വീണക്കമ്പികൾ പൊട്ടുന്നു,

മായുന്നു മായക്കാഴ് ച്ചകളാണെല്ലാം.,

മഴമേഘ രഥമേറി നീ വന്നു നിന്നതും, 

വർണങ്ങൾ വാരി വിതറിയെൻ മിഴികളിൽ, 

മഴവില്ലിൻ അഴക്‌ വിരിയിച്ചു തന്നതും, 

മയിൽപേടയേ പോലെയെൻ അകതാരിൽ, 

മയൂര നൃത്തമാടി തിമിർത്തതും,

മായുന്നു മായക്കാഴ്ച്ചകളാണെല്ലാം.,

കണ്‍പോളകൾ കൂമ്പി അടയുന്നതിൻ മുമ്പേ, 

സ്മൃതി നശിച്ചെല്ലാം മറയുന്നതിൻ മുമ്പേ, 

ഒരു നിമിഷവും കൂടി തരിക നിൻ പുഞ്ചിരി-

-പൂമുഖത്തേക്കെന്റെ മിഴികൾ തുറക്കുവാൻ.

********

കണിക്കൊന്ന

മഞ്ഞകസവണി ഞൊറിയുടുത്ത്, 

പൊന്‍ കണിക്കൊന്നകള്‍ പൂത്തുലഞ്ഞു., 

ഹൃദയാങ്കണത്തിലും പൊന്നൊളിയായ്, 

പൊന്‍വിഷു പുലരിയുദിച്ചിടുന്നു. 

മഞ്ഞള്‍ നിറമോലും പൂങ്കുലയില്‍, 

തുള്ളികളിച്ചിടും പൂമൊട്ടുകള്‍.,

കണ്ണന്റെ പൊന്നരഞ്ഞാണത്തിലെ, 

കിങ്ങിണി പൊന്‍മണി മുത്ത്‌ പോലെ.

ആകാശത്തമ്പിളിവെട്ടത്തിലായ്,

താരാഗണങ്ങളേപോലെയാവാന്‍., 

മേടമാസ പാല്‍നിലാവ് കൊള്ളാന്‍, 

മോഹിച്ച മോഹങ്ങളാരു കാണാന്‍.

മൃദു ശാഖ തല്ലി കൊഴിച്ചു കൊണ്ട്, 

വാണിഭ കെട്ടുകളാക്കി മാറ്റി, 

വിലയിട്ടു വിലപേശി വിറ്റിടുന്നു,

വാസന്ത  മന്ദസ്മിതങ്ങളെല്ലാം.

എങ്കിലും പൊന്‍കണിയായി മാറാന്‍, 

കര്‍ണികാരം  പൂത്തുലഞ്ഞിടുന്നു., 

കണ്ണന്റെ പാദാരവിന്ദങ്ങളില്‍, 

ഞെട്ടറ്റു പൊഴിയുവാന്‍  മോഹമോടെ. 

മഞ്ഞ കസവണി ഞൊറിയുടുത്ത്, 

പൊന്‍ കണിക്കൊന്നകള്‍ പൂത്തുലഞ്ഞു., 

ഹൃദയാങ്കണത്തിലും പൊന്നൊളിയായ്, 

പൊന്‍ വിഷു പുലരിയുദിച്ചുവന്നു.  

**********

വരുന്ന ഏപ്രില്‍ 14 മേടം 1 നു പുതിയൊരു  വിഷുപുലരികൂടി പൊട്ടിവിടരുന്നു
പ്രിയപ്പെട്ട ഏവര്‍ക്കും ഹൃദയം നിറഞ്ഞ വിഷു ആശംസകള്‍ !

സ്നേഹത്തോടെ,
ഗിരീഷ്‌

*************

അമ്മ ഈ മനസ്സിലെ നന്മ.

അമ്മ, ഈ ഉണ്ണിതന്‍ മനസ്സിലെ നന്മ

മൂര്‍ദ്ധാവിലായ് വന്നു പതിയുന്ന ചുംബന-

-ചൂടുള്ള സ്നേഹത്തിന്‍ മഹിമ.

സ്നേഹവാത്സല്യം അലിയിച്ച വാക്കുകള്‍

നിറയുന്നു ഉണ്ണിതന്‍ കര്‍ണനാളങ്ങളില്‍.

അമ്പലത്തില്‍ പോയി വരികയെന്‍ ഉണ്ണി നീ,

ദേവിയെ കണ്‍ നിറയെ കണ്ടു തൊഴുതുവാ,

വന്നിട്ട് ചൂടുള്ള ദോശ നല്‍കാം അമ്മ,

എന്റെ പോന്നുണ്ണീടെ വയറുനിറച്ചിടാം.

ഉണ്ണിക്കിതെല്ലാം മധുരം അമ്മയുടെ

പുഞ്ചിരി പാലൊളി വിതറുന്ന നോട്ടവും

മധുരസം ഊറി ഒഴുകുന്ന മൊഴികളും

ഉണ്ണിക്കിതെല്ലാം മധുരം.

ഉണ്ണി കാലടിവച്ചടിവച്ചടിവച്ച്,

അമ്പല ഗോപുര വാതിലില്‍ എത്തവെ,

ഗോപുര മതിലിനരികിലിരിക്കുമൊ-

-രമ്മതന്‍ ദീനാനുകമ്പ കെഞ്ചും മുഖം-

-കണ്ടൊട്ടുനേരം അതുനോക്കിനിന്നുപോയ്‌

നന്മയാം നറുനിലാവാം തരി വെളിച്ചമായ്,

സ്നേഹവാത്സല്ല്യം തുളുമ്പുന്ന ഭാവങ്ങള്‍,

ഏതോ വിഷാദം പരത്തിയ നിഴലിലായ്,

മിന്നി മിന്നി പടരുന്നുവോ മെല്ലെ.

ഇരുളിന്റെ മേഘശകലങ്ങള്‍ മായിച്ച,

മുഴുതിങ്കള്‍ പാല്‍ നിലാവിന്‍ നറുവെട്ടം,

ഒരു നിമിഷ നേരമതൊന്നിതാ തെളിയുന്നു,

മറയുന്നു തെളിയുന്നു പിന്നെയും മായുന്നു.

നരകേറി ജടവന്നൊരീ മുടിയിഴകളും

കവിളിലെ ചുളിവുമീ ശോഷിച്ച കൈകളും

വാര്‍ദ്ധക്യമോ അതോ തീരാ വിഷാദമോ

തെല്ലൊട്ടുനേരം അതുനോക്കി നിന്നുപോയ്.

എന്തേ ഉണ്ണി ഇങ്ങനെ നോക്കുവാന്‍?

അമ്മയുടെ വയറു വിശന്നു പൊരിയുന്നു,

എന്തുണ്ട് കൈയ്യില്‍ അമ്മക്ക് നല്‍കുവാന്‍,

തരികനീ വല്ലതും തന്നിട്ട് പോകണേ.

ഉണ്ണിയെന്നുള്ളൊരാ വിളികേട്ടുള്‍പുളകത്താല്‍

ഉണ്ണിതന്‍ കണ്‍കള്‍ തുടിച്ചുപോയ്.

ഉണ്ണി തന്‍ കൈകള്‍ പരതി കീശയില്‍.

വാടിയ മുഖമൊന്നു താഴ്ത്തി പറഞ്ഞുണ്ണി.

ഇല്ലമ്മേ കൈയിലൊന്നുമേ നല്‍കിടാന്‍,

നാണയ തുട്ടുകളുണ്ടത് തരികില്ലാ

ദേവിതന്‍ കാണിക്ക, അമ്മ പിണങ്ങിടും.

തൊഴുതു മടങ്ങിടും നേരത്ത്

വീട്ടിലേക്കമ്മയെയും കൊണ്ടു പോയിടാം,

വയറു നിറച്ചുമാഹാരം നല്‍കിടാം,

അമ്മയുടെ വിശപ്പെല്ലാം അകറ്റിടാം.

വേണ്ടുണ്ണീ ഒന്നുമേ വേണ്ടുണ്ണീ,

നാളെയും വരികനീ ദേവിയെ തൊഴുകനീ,

അമ്മയോടൊരുവാക്ക് മിണ്ടിയാല്‍ അതുമതി,

അമ്മക്ക് വയറു നിറയുവാന്‍.

പോയ്‌ വരാം വീട്ടില്‍ പോയിയെന്‍

അമ്മയെയും കൂട്ടി മടിയാതെ എത്തിടാം.

ആഹാരം ഞാന്‍ കൊണ്ടുവന്നിടാം,

ഒങ്ങുമേ പോകാതെ ഇവിടെ ഇരിക്കണേ.

ദേവിയെ തൊഴുതു മടങ്ങി വീട്ടി-

-ലമ്മയോടീവിതം കാര്യമുണര്‍ത്തവെ,

സ്നേഹ വാത്സല്യം അലിയിച്ച വാക്കുകള്‍

നിറയുന്നു ഉണ്ണിതന്‍ കര്‍ണനാളങ്ങളില്‍.

പ്രാന്തോ നിനക്ക് ! കൈ കഴുകിവരികുണ്ണി,

ചൂടുള്ള ദോശ വിളമ്പി ഞാന്‍ ഊട്ടിക്കാം,

നേരംപോയ്‌ സ്കൂള്‍ബസ് വരുവാന്‍ നേരമായ്.

ദോശ ചവച്ചിറക്കുവാന്‍ ആവാതെ,

ചിന്തയിലാണ്ടങ്ങിരിക്കുമീ ഉണ്ണിതന്‍

കണ്‍കളില്‍ നിറയുന്നു കണ്ണുനീര്‍ തുള്ളികള്‍.

ഉണ്ണിക്കിതേഉള്ളു ആ അമ്മക്ക് നല്‍കുവാന്‍

കണ്ണുനീരിന്‍ ഈ കൊച്ചു മണിമുത്തുകള്‍,

ഉണ്ണിതന്‍ കൈകളില്‍ വീണു തിളങ്ങുമീ

കണ്ണു നീര്‍ത്തുള്ളിയാലാ വിശപ്പകലുമൊ?

അയ്യോ ! ഉണ്ണീ ! കരയാതെ പൊന്നേ,

മധുരിത ശബ്ദമീ കാതില്‍ പതിയവേ

സാരിതലപ്പിനാല്‍ കണ്‍കള്‍ തുടക്കവേ

കണ്ണുനീര്‍ തുള്ളികള്‍ ഉണ്ണിതന്‍ നാവിലായ്‌

നൊമ്പരത്തിന്‍ ഉപ്പു രസമായി നിറയവേ

മൂര്‍ദ്ധാവിലായ് വന്നു പതിയുന്ന സ്നേഹമാം

ചുംബനതിന്‍ ഇളം ചൂട് പടരവേ

ഉണ്ണിക്കിതെല്ലാം മധുരം അമ്മയുടെ

പുഞ്ചിരി പാലൊളി വിതറുന്ന നോട്ടവും

മധുരസം ഊറി ഒഴുകുന്ന മൊഴികളും

ഉണ്ണിക്കിതെല്ലാം മധുരം.

*******

മന്ദാര പൂവ്

മന്ദാര പൂവേ മൊഞ്ചുള്ള പൂവേ

വെണ്‍ മേഘ ഇതളുകള്‍ക്കെന്തു ഭംഗി. 

പഞ്ചാര പുഞ്ചിരിക്കെന്തു ചന്തം.,

കവിളിലെ നുണക്കുഴിക്കെന്തു ചേല്,

ആ പ്രഭാവലയത്തില്‍ വട്ടം പറക്കുന്ന,

ശലഭമായി മാനസം മാറി പൂവേ.

മന്ദമായ് മന്ദമായ് ഒഴുകിടുന്ന 

കാറ്റിന്റെ സംഗീതം കേള്‍പ്പതില്ലേ., 

താളത്തില്‍ ഈണത്തില്‍ പാട് പൂവേ, 

ചാഞ്ചക്കം ആലോലം ആടു പൂവേ, 

പാല്‍ നിലാവഴകുള്ളോരോമല്‍ പൂവേ.

നാളെ ഈ ഇതളുകള്‍ കൂമ്പിയേക്കാം.

വാടി കരിഞ്ഞു പൊഴിഞ്ഞു പോകാം. 

മായില്ല നിന്‍ മൃദു മന്ദഹാസം.,

മാനസത്തില്‍ ഇതള്‍ വിടര്‍ത്തി നില്‍ക്കും,

മായാത്തൊരോര്‍മയായ് തങ്ങി നില്‍ക്കും. 

മായില്ല നിന്‍ മൃദു പാല്‍ പുഞ്ചിരി. 

മാനസത്തില്‍ ഇതള്‍ വിടര്‍ത്തി നില്‍ക്കും, 

മായാത്തൊരോര്‍മയായ് തങ്ങി നില്‍ക്കും. 

********************