Monday, January 7, 2013

പുലര്‍ക്കാല സ്വപ്നങ്ങള്‍


വെണ്‍ മേഘ പാളികള്‍ക്കിടയിലായ് 
തെന്നിവന്നെത്തി നോക്കുന്നിതാ  ഉദയ സൂര്യന്‍ 


രക്തവര്‍ണാവൃത സുസ്മിതം വിടരുന്നു
രാവകന്നീടുന്നു  ഭൂവിലാകെ 


മാന്തളിര്‍ പൂക്കളില്‍ മിന്നിത്തിളങ്ങുന്ന 
മഞ്ഞുനീര്‍ത്തുള്ളികള്‍ മണിമുത്തുകള്‍ 


തെച്ചിയും മന്ദാര പൂക്കളും തെന്നലില്‍ 
താളത്തിലാടുന്നു  ചെമ്പരത്തി 


മന്ദമായ് മന്ദസ്മിതം പൊഴിച്ചീടുന്ന 
പൂക്കളാല്‍ മാനസം പൂത്തുലഞ്ഞു 


ആഹാ മനോഹരം മായയോ മായികാലോകമൊ 
പുലര്‍ക്കാല സ്വപ്നങ്ങളോ 


മായല്ലെ  മറയല്ലെ  മാഞ്ഞുപോയീടല്ലേ 
മാനത്ത് കാര്‍മുകില്‍ വന്നിടല്ലേ

മാമരച്ചില്ലകള്‍ കാറ്റിലുലയുന്നു
പൂമരം പൂക്കള്‍ പൊഴിച്ചിടുന്നു 


കാതുകള്‍ക്കിമ്പമായ് താളത്തിലീണത്തില്‍ 
കുയിലുകള്‍  മധുരമായ് പാടിടുന്നു 


വാദ്യഘോഷങ്ങള്‍ പോല്‍ അവിടെയുമിവിടയും 
പലതരം കിളികള്‍ ചിലച്ചിടുന്നു 


കൊക്കുരുമ്മി ചിറകൊതുക്കി ഒരു കൊച്ചു 
തത്തയൊരു കൊമ്പിലായ് വന്നിരിപ്പൂ 


മോഹങ്ങളുണ്ടതിന്‍ ഹൃദയത്തിലാ 
കൊച്ചു പച്ചനിറത്തിലെ ചിറകിനുള്ളില്‍ 


സ്വപ്നങ്ങളാം പട്ടുനൂലതില്‍ മിന്നുന്ന 
മുത്തുകള്‍ കോര്‍ത്തൊരു മാലയാക്കി 


ദൂരെയേതോ ഒരു കൂട്ടിലായ് അമ്മയും 
അച്ഛനും കണ്‍ പാര്‍ത്തിരിപ്പതുണ്ടേ 


അച്ഛന്റെ  പുന്നാര മോളാണ് അമ്മക്ക് 
കണ്ണാണ് കരളാണ് ഹൃദയമാണ് 


മോഹങ്ങള്‍ മുത്താക്കി മാറ്റുവാന്‍ ഓമന 
മകളുടെ ഭാവിയെ ഭദ്രമാക്കാന്‍ 


കണ്ണുനീരുപ്പു പുരട്ടിയ ഭക്ഷണം
അരവയര്‍ പട്ടിണി എന്നുമെന്നും 


അറിയാതെയെങ്കിലും അമ്പെടുത്തുന്നം 
പിടിക്കല്ലേ വേടനായ് മാറിടല്ലേ 


അരുതെന്ന് സ്വയമറിഞ്ഞുയരുവാന്‍ അറിവിന്റെ 
കിരണങ്ങള്‍ കൈകളാല്‍ ഏറ്റുവാങ്ങാന്‍ 


വിടരട്ടെ ഒരു പൊന്‍ പുലരിയീ മാനവ
 ഹൃദയത്തിനുള്ളിലും നറുവെട്ടമായ് 

**********



Saturday, December 29, 2012

ആത്മശാന്തിക്കായ് ഒരു ചോദ്യം.


ചവിട്ടിയരക്കപ്പെട്ട ഒരു പെണ്‍ഹൃദയം. 

പേടിച്ചു വിരണ്ട് ചിറകടിച്ചു പറന്നുപോയ ഒരു  ആത്മാവ് 

ഇരതേടി അലയുന്ന പുലികളും സിംഹങ്ങളും 

ചോര ഇറ്റിറ്റു വീഴുന്ന കൂര്‍ത്ത മുനയുള്ള കഴുകന്‍ കൊക്കുകള്‍ 

നിബിഡാന്ധകാരം നിറഞ്ഞ  ഘോര വനത്തില്‍ 

മേഞ്ഞുനടക്കാന്‍ വിധിക്കപ്പെട്ട പേടമാനുകള്‍ തല ചുറ്റിലും  തിരിച്ച്   ആരെയാണ് തിരയുന്നത് 

ആ മാംസ കൊതിയന്മാരെയോ അതോ

അവളുടെ ആത്മാവ് ഒരുനോക്കു കാണുവാന്‍ കൊതിച്ച മനസാക്ഷിയെയോ? 

                                                                         ***********

Saturday, December 8, 2012

വെളുത്താട്ട് ഭഗവതി





വെളുത്താട്ട് ഭഗവതി ശരണമമ്മേ ദേവി 

തൃപ്പാദകമലങ്ങള്‍ കൈതൊഴുന്നേന്‍ 

ഇരുളല കരിനിഴല്‍ തീര്‍ക്കും തൃസന്ധ്യയില്‍ 

നിലവിളക്കില്‍ തിരി നാളങ്ങള്‍ തെളിയുന്ന 

തിരുനടയിലെത്തുവാന്‍ ഹൃദയം തുടിക്കുന്നു 

കലികാല ദോഷങ്ങള്‍ നീങ്ങിടേണം അമ്മേ-

- കരുണയൊരു വെട്ടമായ് മാറിടേണം 

ഉള്ളം നിലാവുപോല്‍ ശോഭിക്കണം 

നാവിലെന്നുമാ നാമങ്ങള്‍ വന്നിടേണം 

പഞ്ചവാദ്യത്തിന്റെ താളപെരുമഴ 

ശംഖനാദം കുടമണിയൊച്ചയില്‍

അമ്മതന്‍ തിരുനാമ ഘോഷങ്ങള്‍ കേട്ടിന്നു 

ദീപാരാധന തൊഴുവാന്‍  കനിയണം 

മനസ്സ് നിറച്ചുമനുഗ്രഹം ചൊരിയണം

**************


വെളുത്താട്ട് വടക്കന്‍ ചൊവ്വ ഭഗവതി ക്ഷേത്രത്തെ

കുറിച്ചുള്ള വിവരങ്ങള്‍ ഈ ലിങ്കില്‍ ലഭ്യമാണ്.

http://www.veluthattamma.org/about.html


Friday, November 30, 2012

ഹരിതക തളിരുകള്‍






നരകമാം ഈ നഗര വീഥിതന്‍ ഓരത്തു


കിളിര്‍ത്തീടുമല്ലോ  പുല്‍തളിരിലകള്‍


അനാഥത്ത്വമാം അഗ്നിജാലാ മുഖത്തു-


-നിന്നൂമുതിരും വിഷാദമാം രശ്മികള്‍


ചുടലനൃത്തം ചെയ്തു നിറയുമീ പകലുകള്‍


മാഞ്ഞു മറയുന്ന വര്‍ഷകാലങ്ങളില്‍


കനിവിന്‍റ കാര്‍മുകില്‍ ഉറയുന്നൊരാകാശ


ഹൃദയം വിതുമ്പി തുളുമ്പുന്ന വേളയില്‍


മിഴികളില്‍ നിറയുന്ന കുളിരുമായെവിടെയും


താനെകിളിര്‍ക്കുന്ന ഹരിതക തളിരുകള്‍


സ്വാഗതമരുളീടുമല്ലോ അനേകരോടൊപ്പ-


-മീഞാനുമെന്‍ ദാഹിച്ച ഹൃദയവും


വറ്റി വരണ്ടൊരീ പുഴയിലായി പുകയുന്ന


തീക്കനല്‍ പോലുള്ളോരീ മണല്‍ തരികളും


വാടി കരിഞ്ഞൊരാമ്പലില്‍ അവസാന


ജീവന്‍ തുടിക്കുന്ന വേരുംമടിത്തണ്ടും


ഏവരും സ്വാഗതമരുളുമാ വേളയില്‍


ഇലകള്‍ളൊരു കാറ്റിലൊന്നാടി ചിരിച്ചിടും


വെറുതെയാണീയൊരു പാഴ്ക്കനവെങ്കിലും


നാളെ ഇനി വീണ്ടുമൊരു വേനല്‍ വന്നീടിലും


മനസ്സിലുണങ്ങി വരണ്ടൊരീ മണ്ണിതില്‍


കണ്ണുനീര്‍ ഇറ്റിറ്റു വീണതാം നനവിലായി


പൊട്ടിമുള വന്നിന്നൊരാല്‍മര തളിരില


ഒരു കുഞ്ഞു പൈതലിന്‍ പുഞ്ചിരി പോലുള്ള


ഹരിതാഭ ശോഭ നിറഞ്ഞതാം തളിരില


മതിയാകയില്ല എന്‍ കണ്ണുനീരീച്ചെടി-


-നനച്ചീടുവാനതിന്‍ ദാഹം ശമിക്കുവാന്‍


ആകെ പരിഭ്രമുണ്ടെന്‍റെ മനമതില്‍-


-വാടികരിഞ്ഞുണങ്ങീടുമോ ഈ ചെടി?



*****************

Monday, November 12, 2012

നറുതിരിവെട്ടം

കണ്ണുകളിരുട്ടാല്‍   മറഞ്ഞൊരാ സ്നേഹിത- 

-നെന്നുമെന്‍ കണ്ണുകള്‍ നനയിക്കുമെങ്കിലും 

കണ്ടില്ല കാണിച്ചതില്ലവനാരണ്ടു 

കണ്ണുകളീറനണിഞ്ഞതൊരിക്കലും  


എന്തൊരളവറ്റശാന്തിയാഹൃദയത്തിലെ-

-ന്തൊരാനന്തമാനിറപുഞ്ചിരിക്കെ-

-ന്തൊരാവേശമാഹ്ലാദമാമൊഴികളെ-

ന്തൊരാശ്വാസ മധുരമാസാമിപ്യം  


കണ്ണു തുറന്നു പിടിച്ചാലുമടച്ചാലും 

കണ്‍മുന്നിലെവിടെയുമിരുളലകള്‍മാത്ര-

-മെന്നാലതെന്തൊരു ദുരിതമെന്നൊരുവേള 

ചിന്തിച്ചഞാനെത്ര വിഡ്ഢിയെന്നോര്‍ത്തുപോയ് 


ഹൃദയത്തിലായിരം ആശകള്‍തീര്‍ക്കുമീ 

കാഴ്ച്ചകളൊക്കെയും കണ്ടുമടുത്തിന്നതെ-

-ല്ലാമുറഞ്ഞൊരു നൊമ്പരമാകുമ്പോള്‍ 

കണ്ണടച്ചീടുന്നു ഞാനുമൊരുവേളയെന്‍ 

ഉള്ളിലായ് അണയാതെ എന്നും തെളിയുമാ 

നറുതിരിവെട്ടമൊന്നൊരുനോക്ക് കാണുവാന്‍  

******************


Monday, October 29, 2012

കളികൂട്ടുകാരന്‍

കുങ്കുമവര്‍ണാങ്കിത സുന്ദര സുസ്മിതം

വിടരുന്ന നിന്‍ മുഖം മനോഹരം

നീ എന്നുമെനിക്കെന്നുമൊരു കളികൂട്ടുകാരന്‍

പുതിയ മേച്ചില്‍പുറങ്ങളിലേക്കെന്നെനയിക്കുന്നൊരിടയന്‍

 ചിലനേരമാ മേഘപാളികള്‍ക്കുള്ളിലൊളിച്ചു കളിച്ചു രസിക്കും


ചിലനേരമാ പച്ചില ചില്ലകള്‍ക്കിടയിലായ് -

-വന്നൊളികണ്ണിട്ടെത്തിനോക്കും


പരിഭവങ്ങളൊരുതെല്ലുമില്ലാതെയകലാതെ

- പിരിയാത്തൊരെന്‍ കൂട്ടുകാരന്‍


നിന്നെ അനുഗമിച്ചനുഗമിച്ചിന്നിതാ

ഈ സായന്തനത്തിലീ കടല്‍ക്കരയിലൊ- 

-രേകാന്ത മനസ്സുമായി മൗനമായി വന്നുനില്‍പൂ


ജീവിതാന്ത്യത്തിലീതിരകളലഞോറിയുമീ-

-തീരത്തിലീപൂഴിമണലില്‍


ഒഴുകുന്നകാറ്റിലകതാരില്‍ നിറയുന്ന നൊമ്പര- 

-മലിയുന്ന കുളിരില്‍


നീ ഉറങ്ങുവാന്‍ പോകുമീനേരംവയ്കിയ വേളയില്‍

നടക്കട്ടെ തിരിഞ്ഞു ഞാനെന്റെ കുടിലിലേക്കങ്ങുമെല്ലെ


നടന്നുനടന്നേറെ തളര്‍ന്നൊരീകാലുകുഴയുന്നുവല്ലോ


തൊണ്ടയിലടര്‍ന്നു  ചിന്നിചിതറുമീ 

ചുമയിലടിപതറുന്നുവല്ലോ


ചിരിതൂകി നിന്ന മുഖങ്ങളകലത്തകന്നകന്നുപോയീ 


പിന്നിലായ് പതിഞ്ഞൊരാ കാലടി പാടുപോല്‍ 

സര്‍വവും ദൂരത്തു  മാഞ്ഞ്  മാഞ്ഞുപോയ്‌   


താങ്ങുവാന്‍ തണലാകുവാനായരികിലിന്നീ- 

-യൊരൂന്നുവടി മാത്രം 


എങ്കിലും വിഷമിപ്പതില്ലയെന്‍ മനമൊരു തെല്ലും


കണ്ണ് ചിമ്മിടും താരകള്‍ നിറയുമാകാശമുണ്ടല്ലോ

പെയ്തുനിറയുന്ന നിറനിലാവതും നീതന്നെയല്ലോ


നിന്‍ വിരല്‍ തഴുകുന്ന പൂക്കളുണ്ടല്ലോ


നീ വന്നു തൊടുവാന്‍ തളിര്‍ക്കുന്ന ഇലകളുണ്ടല്ലോ


നീയെന്നുമുറങ്ങിയുണരുമീ കടലിലെ തിരകളുണ്ടല്ലോ


ഇനിയെന്തുവേണമീ നിബിഡാന്ധകാരത്തില്‍

സുഖനിദ്രപൂകുവാന്‍  


പുതു പുതു മോഹങ്ങള്‍ സ്വപ്നങ്ങള്‍ മുളവന്നു

പൊന്‍കതിരണിയുവാന്‍ 


ഉണരുമോ ഞാനിനിയുമൊരു  പുലരിയില്‍

നീ അരികത്തു വന്നിടും നിമിഷത്തി-

ലൊരുവേളയാചിരിയൊരുനോക്കു കാണുവാന്‍ 


നിലക്കാതിരിക്കുമോ ഹൃദയ താളമേ


ഇനിയുമൊരു സുപ്രഭാതത്തിന്‍ സുസ്മിതംനുകരട്ടെ

ഹൃദയമേ മുഴങ്ങിടട്ടെ നിന്‍ മൃദുസ്പന്ദനം

ഇനിയും മുഴങ്ങിടട്ടെ നിന്‍ മൃദുസ്പന്ദനം


**********


മഴപെയ്തുതോര്‍ന്നൊരു സായാഹ്നത്തില്‍ തൊടിയിലെ മരച്ചില്ലയില്‍ വിരുന്നുവന്ന ആ അണ്ണാറകണ്ണന്‍ മനസ്സ് മരവിച്ചിരുന്ന ആ അപ്പൂപ്പന്റെ കണ്ണുകളില്‍ പ്രകാശം വിരിയിച്ചു.രോമം നിറഞ്ഞ വാലുയര്‍ത്തിയിളക്കി തല ചുറ്റുപാടും  ചലിപ്പിച്ച്  അണ്ണാറകണ്ണന്‍ അപ്പൂപ്പനെ രസിപ്പിച്ചു. എന്തെന്നില്ലാത്ത ഒരു കരുത്ത് ആ  മനസ്സില്‍ വന്നു നിറഞ്ഞു അതിന്റെ അടയാളം അപ്പൂപ്പന്റെ  മുഖത്ത് ഞാന്‍ കണ്ടു.  പിന്നെ കുറെയേറെ സംസാരിച്ചു.അടുത്തിരിക്കുന്ന ആള്‍  താന്‍ പറയുന്നത്  ശ്രദ്ധിക്കുന്നുണ്ട് എന്നതും തിരിച്ച്  എന്തെങ്കിലും ചോദിക്കുന്നതും അപ്പൂപ്പനില്‍ ഉത്സാഹം നിറക്കും. ഞാന്‍ ശ്രദ്ധയോടെയും  തിരിച്ചു ചോദ്യങ്ങള്‍ ചോദിച്ചുകൊണ്ടും ഇരുന്നു. ആ വീട്ടില്‍ അപ്പൂപ്പന്‍ ഒരു വിരസ കഥാപാത്രമാണ്. മരുന്ന് കൊടുക്കാനും ഭക്ഷണം കൊടുക്കാനും മാത്രമാണ് ആരെങ്കിലും എന്തെങ്കിലും മിണ്ടുന്നത്. അപ്പൂപ്പന്‍ പലപ്പോഴും എന്തൊക്കെയോ പഴയ ഓര്‍മ്മകള്‍ ഓര്‍ത്തെടുത്തു വെറുതെ പറഞ്ഞുകൊണ്ടിരിക്കുമെങ്കിലും ആരും ഒന്നും ശ്രദ്ധിക്കില്ല.    പെട്ടന്ന് അകത്തുനിന്നും ഒരു ശബ്ദം കേട്ടു.  "ഇങ്ങനെ തണുപ്പത്ത് വരാന്തയില്‍ ഇരിക്കുന്നത് എന്തിനാണ് രാത്രി മുഴുവന്‍ ചുമച്ച് കുരക്കാനാണോ അകത്തുപോയി കിടന്നൂടെ" അപ്പോളും അപ്പൂപ്പന്റെ മുഖത്ത് വിരിഞ്ഞ ആ ചിരി മങ്ങിയില്ല. ആ അണ്ണാറകണ്ണന്‍ അപ്പൂപ്പന്റെ മനസ്സിനെ അത്രത്തോളം തണുപ്പിച്ചിരുന്നു. പതിയെ എഴുന്നേറ്റ്  വടികുത്തിപിടിച്ച് അപ്പൂപ്പന്‍ അകത്തേക്ക് നടന്നുപോയീ. അണ്ണാറകണ്ണനും  അപ്പോഴേക്കും എങ്ങോ പോയി മറഞ്ഞു എങ്കിലും  ഞാന്‍ മരചില്ലയിലേക്ക് നോക്കി പറഞ്ഞു എന്റെ അണ്ണാറക്കണ്ണാ  നീ നാളെയും വരണേ നിനക്ക് മാത്രമേ ആ അപ്പൂപ്പന്റെ മനസ്സ് തണുപ്പിക്കാനാകു, തീര്‍ച്ചയായും വരണം.നാളെ ഉറക്കമുണർന്ന് ഉമ്മറത്തെ ചാരുകസേരയിൽ വന്നിരുന്നു പ്രതീക്ഷയോടെ മരചില്ലയിലേക്ക് ഉറ്റുനോക്കുമ്പോൾ നിരാശനായാൽ ആ മനസ്സ് എങ്ങിനെ സഹിക്കും??? അതോർത്തപ്പോൾ ഇത്രയും കുറിച്ചുപോയീ. ഈണവും താളവും ഇല്ലാത്ത ആ വരികള്‍  നിങ്ങളില്‍  വിരസത ഉണ്ടാക്കിയില്ല  എന്ന് വിശ്വസിക്കട്ടെ ഈ പുക്കളും ഇലകളും നിറഞ്ഞ പ്രകൃതിയുടെ സുന്ദരമായ കാഴ്ചകളെല്ലാം  വിഷാദം നിറഞ്ഞ  മനസ്സുകളില്‍   മോഹങ്ങളും സ്വപ്നങ്ങളും നിറക്കുമ്പോള്‍ നമ്മള്‍ മാത്രം എന്തിന്  അവരെ അവഗണിക്കുന്നു? 



****************








Thursday, October 25, 2012

ഒരു കുഞ്ഞു പഞ്ചവര്‍ണ്ണ കിളി



ലാലയൊരു കുഞ്ഞു മാലാഖ നീയിന്നു 

മാലോകര്‍ മാറോടു ചേര്‍ത്തണച്ചീടുന്ന

വേടന്റെ കാലൊച്ച കേട്ടു ഭയക്കാത്ത

ചിറകുറച്ചീടാത്ത പഞ്ചവര്‍ണ്ണ കിളി

ചോളങ്ങള്‍ പൂത്തുലഞ്ഞുലയുന്ന പാടത്ത് 

പാറി പറക്കുവാനാശിച്ച പെണ്‍കിളി 

എന്തു നീ ചെയ്തൊരപരാധമോമനേ

മഴപെയ്തു തോര്‍ന്നൊരു നേരത്ത് മാനത്ത് 

മഴവില്ലു വര്‍ണം വിരിച്ചൊരു വേളയില്‍ 

ഉള്ളം നിറഞ്ഞൊന്നുറക്കെ ചിരിച്ചതോ 

തുള്ളി കളിക്കുവാന്‍ ഹൃദയം തുടിച്ചതോ 

കാര്‍മേഘപടലങ്ങള്‍ മൂടിയ രാത്രിയില്‍ 

ഇരുളുനിറഞ്ഞൊരാ താഴ്വാരഭൂമിയില്‍

ഒരു ചന്ദ്രബിംബമായി  ഉദിച്ചുയര്‍ന്നതോ 

അറിവിന്‍നിലാവായ് വെളിച്ചമായിപെയ്തതോ 

കുഞ്ഞനുജത്തിമാര്‍തന്‍ നിറകണ്ണുനീര്‍ 

ഒപ്പിയെടുത്തിളം ചോരയാല്‍ വരികളാല്‍ 

ചിത്രം വരച്ചതോ നീ ചെയ്ത പാതകം 

അറിയില്ല ഓമനേ അറിയില്ല ഉള്ളത്തില്‍  

നിറയുന്ന ചോദ്യത്തിനുത്തരമില്ലില്ല 

നീയേകയല്ലിന്ന് ഈ ലോക ഹൃദയങ്ങള്‍ 

ഉരുകുന്നു കണ്‍പാര്‍ത്തിരിക്കുന്നുറങ്ങാതെ

ഉണരട്ടെയെന്‍പോന്നനുജത്തി ഉണരട്ടെ 

ഇനിയുമൊരു സുപ്രഭാതം പൊട്ടി വിടരട്ടെ 

അകലട്ടെ ഇരുളല ചൊരിയട്ടെ പൊന്‍പ്രഭ 

വിരിയട്ടെ ശാന്തിതന്‍ പൂക്കള്‍ ഹൃദയങ്ങളില്‍ 

വിരിയട്ടെ ശാന്തിതന്‍ പൂക്കള്‍ ഹൃദയങ്ങളില്‍ 

***************