കണ്ണുകളിലെ നനുത്ത പുഞ്ചിരികൾ ..
ആവേശത്തിരമാലകൾ
അസ്തമയ സൂര്യന്റെ
ശോണവർണ്ണത്തിൽ പൊതിഞ്ഞ
മന്ദഹാസം ..


വിറ്റഴിയാത്ത ബലൂണുകളും
പാറി പറക്കുന്ന പട്ടങ്ങളും
തൂക്കിപിടിച്ച്..
തളർന്ന കാലുകളൂന്നി..
വിഷാദമുറ്റുന്ന കണ്ണുകൾ 
ആകാശത്തിലേക്കൂന്നി..
ഇനി എന്ത്.. എന്ന ഉത്തരം തേടുന്ന
ഒരു പാവം ചെറുപ്പക്കാരൻ..


മറഞ്ഞു പോയ സൂര്യൻ..
അരിച്ചിറങ്ങുന്ന ഇരുട്ട്..
പിരിഞ്ഞു പോകുന്നവരുടെ
പതിഞ്ഞ കാലൊച്ചകൾ..


************

പറഞ്ഞതില്ലൊരു വേള പോലും ഞാൻ
മമ ഹൃത്തിൽ പനിനീർ ദളങ്ങൾ പോൽ
സൂക്ഷിച്ച പ്രണയത്തെ..

അനുരാഗ സുരഭില മാനസം
നിൻമനം അറിയുന്നതുണ്ടെന്നു
മിഥ്യാ ധരിച്ചു ഞാൻ.

അകലുന്നുവോ മേലെ നീല വിഹായുസ്സിൽ
മാഞ്ഞു പോകുന്നൊരു പൗർണ്ണമി  പോലെ നീ.

അവിരാമം അലകൾപോൽ അകതളിർ പൊതിയുന്നു
 അഗ്നിപോൾ എരിയുന്നു പ്രണയാർദ്രമൊരു നോവ്

ഇന്നിതു വൈകിയ  വേളയാണെങ്കിലും
ഒന്നു ഞാൻ നിൻ കരം കവരട്ടെ എൻ പ്രിയേ..

പറയാതെ മനസ്സിലൊളിപ്പിച്ചതൊക്കെയും
ഒന്നു ഞാൻ നിൻകാതിൽ മോഴിയട്ടെയെൻ  പ്രിയേ..  

പെയ്യാത്ത മഴ

എവിടെയോ വിരുന്നുവന്നൊരു മഴയുടെ തണുപ്പുമായി
ഇന്നൊരു ഇളം തെന്നൽ എന്നെ കൊതിപ്പിച്ചു പോയ്‌..
കരിഞ്ഞ ചെണ്ടുമല്ലിപൂക്കൾ തൊട്ട് തലോടി നിന്ന്
എത്രയോ ശലഭകൂട്ടങ്ങൾ കൊതിച്ച് പറന്നു പോകുന്നു..

നാളെ ഇവിടെയും പെയ്യട്ടെ.... :)

ശുഭരാത്രി..

ശുഭയാത്ര !

അഗ്നി പകരുന്ന നിമിഷത്തിൽ
ശൈശവത്തിന്റെ പാൽപുഞ്ചിരി....

ഒരു ആളികത്തൽ
ബാല്യവും കൗമാരവും യൗവ്വനവും

സായാഹ്ന കിരണത്തിന്റെ  തൂവൽ സ്പർശമായ്
മെല്ലെ മെല്ലെ  തഴുകി മറയുന്ന
വാർദ്ധക്യത്തിന്റെ ജ്വാലാ മുഖങ്ങൾ

മിന്നാ മിനുങ്ങുകളേപോൽ  മന്ദം മന്ദം മിഴി പൊത്തുന്ന
പുകച്ചുരുളുകൾക്കിടയിലെ കനൽപുറ്റുകൾ


ചെമ്പട്ടാൽ  പൊതിഞ്ഞു വച്ച മണ്‍കുടത്തിൽ
ചിതാഭസ്മമായ് ആവാഹിക്കപെടുന്ന പുരുഷായുസ്


 പാതി വഴിയെത്തിയത്രെ ...
എങ്കിലും എത്ര പിന്നിലാണ്..
കടന്നുപോയവർക്കരികിലേക്ക്
കാണാമറയത്തേക്ക്..
ഇനിയുമുണ്ടേറെ....
അതോ അടുത്ത വളവ് തിരിയുമ്പൊഴോ ..?
വഴികളൊക്കെ എത്ര സുന്ദരം..
ഈ യാത്ര വളരെ മനോഹരം..

            *********

തെരുവ് കോമാളി.

തെരുവിലെ വ്യാപാര ശാലക്ക് മുന്നിലെ

കോമാളി ഞാനൊരു കുടവയറൻ 

പാതാള ദേശത്തു വാഴുന്ന എന്നെയും   

കോമാളിയാക്കിയീ വ്യാപാരികൾ

തെരുതെരെ തിരപോലെ അലറിമറിയുന്ന

തെരുവോരമെല്ലാം  മിഴിയുഴിഞ്ഞ്

വെയിൽകൊണ്ട്  നാവു വരണ്ടുപോയ്‌

മെല്ലെ ഞാൻ കുടവയർ തൊട്ട്തടവിനിൽപ്പൂ

കള്ളവും ചതിയും പൊളിവചനങ്ങളും

ഉള്ളൊരു മേടക്ക് കാവൽ നിൽപ്പൂ

തെല്ലിട നേരം കഴിഞ്ഞിതാ ശാന്തമാം  

തെന്നലെൻ അരികത്തൊഴുകിവന്നു 

  വെള്ള നിറമുള്ള കാറിൽനിന്നങ്ങനെ

മൂന്നുപേർ മെല്ലെ ഇറങ്ങി വന്നു

ഭാര്യയും ഭർത്താവൂമാണവർ പിന്നൊരു 

കുട്ടികുറുമ്പിയും കൂട്ടിനുണ്ടേ

കൊച്ചരിപല്ല് പുറത്തുകാട്ടി ചിരി -

-ച്ചച്ചന്റെ കൈപിടിച്ചെന്നെ നോക്കും

കുട്ടികുരുന്നിനോടായി ഞാൻ ചോദിച്ചു

അറിയുമോ എന്നെ നീ കൊച്ചു പെണ്ണെ..?

പണ്ടെങ്ങോ മാമല നാടു ഭരിച്ചൊരു

അസുരനാം രാജൻ മഹാബലി ഞാൻ

അസുരനാണെങ്കിലും പാവം വിദൂഷകൻ

മീശയിതൊന്നിലും കാര്യമില്ല 

പറയുനീ എന്തുണ്ട് ഓണവിശേഷങ്ങൾ

അഴകുള്ള പൊന്നോണ തുമ്പി പെണ്ണെ

എവിടന്നു വന്നു നീ എവിടേക്കു പോണു നീ 

അവിടെല്ലാം പൊന്നോണ പൂ വിരിഞ്ഞോ.?

കാക്കപൂ തുമ്പപൂ ചെത്തിപൂ മഞ്ഞയും-

- ചോപ്പും കലർന്നുള്ള കൊങ്ങിണി പൂ.

കൂട്ടുകാരൊത്തു  നീ ചേമ്പില കുമ്പിളിൽ

നിറയുവോളം പോയി പൂ ഇറുത്തോ..?

പൊൻകതിർ ചാഞ്ചക്കം ആടി മറിയുന്ന 

വയലേല കാണ്ടുവോ കൊച്ചു പെണ്ണെ

കോടി ഉടുത്തുവോ തൈമാവിൻ കൊമ്പിലെ  

ഊഞ്ഞാലിലാടി തിമിർത്തുവോ നീ 
തുമ്പി തുള്ളുന്നത് കണ്ടുവോ പൈതലേ

തുമ്പപൂ ചോറിനാൽ സദ്യ ഉണ്ടോ..?

  ഉച്ചക്ക് ഒന്നു മയങ്ങിയ  നേരത്ത് 

മുത്തശി നല്ലൊരു കഥ പറഞ്ഞോ 

മുറ്റത്തെ പൂക്കളം സ്വപ്നത്തിൽ കണ്ടുവോ   

പാടെ മറന്നങ്ങുറങ്ങിയോ നീ   
സമയമുണ്ടാകുമോ വന്നിടാനെൻ  കൊച്ചു   
 വീട്ടിലേക്കൊന്നു ഞാൻ കൊണ്ടുപോകാം  
അവിടെയുമുണ്ടല്ലോ കുട്ടികുരുന്നൊന്ന് 
കായവറുത്തതും കാത്തിരിപ്പൂ  
അവളുടെ ഓണനിറവിനായാണു ഞാൻ 
കോമാളി വേഷം അണിഞ്ഞു നിൽപ്പൂ 
അവളുടെ പൂങ്കവിൾ വിടരുവാനാണു ഞാൻ 
പൊരിവെയിൽ കൊണ്ട് വിയർത്തുനിൽപ്പൂ 
നേന്ത്രവാഴകുല കൂമ്പിലെ പൂവിന്റെ 
മധുരിമ പോലെന്റെ കൊച്ചു മോള്  
പോരുമോ  അവളോട്‌ കൂട്ടൊന്ന്  കൂടുമോ 
പറയാത്തതെന്തു നീ കൊച്ചു പെണ്ണെ.?
സ്മാർട്ട്ഫോണിൻ ക്യാമറ കണ്ണെന്റെ

നേരേക്ക്  വിറയാതെ ഒന്നുമിന്നിച്ചു കൊണ്ട്

തളതളം താളത്തിൽ തുള്ളി കളിച്ചവൾ

അച്ഛന്റെ കൈപിടിച്ചടിവച്ചു പോയ്‌ 

അപ്പൂപ്പനോടൊന്നും മിണ്ടാതെ പറയാതെ

കൊച്ചു മിടുക്കി നീ പോകയാണോ..?

അപ്പൂപ്പനോടൊന്നും മിണ്ടാതെ പറയാതെ

കൊച്ചു മിടുക്കി നീ പോകയാണോ..?

************

വഴക്കുപക്ഷി ബ്ലോഗ്‌ - സുഖമായിരിക്കട്ടെ...! (കവിത)

പ്രിയരേ,

ഒരു പുതിയ കവിത വഴക്കുപക്ഷി എന്ന ബ്ലോഗിൽ ഇട്ടിട്ടുണ്ട്.

താഴെയുള്ള ലിങ്കിലൂടെ അവിടെ എത്താവുന്നതാണ്. സമയം പോലെ നോക്കുമല്ലോ..?

സുഖമായിരിക്കട്ടെ...! (കവിത)

സ്നേഹത്തോടെ,
ഗിരീഷ്‌

പ്രണയം

തരളമാം മനസ്സ് തണുപ്പിച്ചു കുളിർമഴ
തെല്ലൊന്ന് തോർന്നൊരു നേരം.,

സുഖമുള്ള നിൻ ചുടു നിശ്വാസമായ് പ്രിയേ
വെയിലൊളി മിഴികളെ തഴുകേ....

കണ്ടു നിൻമുഖവും സുസ്മിതവുമെൻ തൊടിയിൽ
ഇന്നിതളിട്ട മന്ദാര പൂവിൽ.,

ദൂരെയാണെന്നും  നീ എങ്കിലും ഇപ്പൊഴെൻ
അരികിലുണ്ടീ  പൂവിതളിൽ.,

നിർമലമാം ദല ഭംഗിയിൽ മിഴിപാകി നിശ്ചലനായി
ഞാൻ നിന്നു.,

നിൻ ഹൃദയാങ്കണ ശോഭയാം തൂമന്ദഹാസമെൻ
അകതാരിൽ നിറഞ്ഞു.,

പിന്നെയും പൊഴിയുന്ന വർഷ ബിന്ദുക്കളെൻ
കവിളത്ത് ചുംബനം നൽകി.,

അകലെയാ വിണ്ണിലായ് സായാഹ്ന വേളപോൽ

നിറവൊളി  പിന്നെയും മാഞ്ഞു.,

അടരുന്നൊരു പുഷപ്പ ദലമീ മണ്ണിലേക്ക-
ണയുന്നതും നോക്കി നിന്നു.,

പറയുവാനിനിയും മറന്നു പോകുന്നു ഞാൻ
അറിയുന്നുവോ നീ എൻ  പ്രണയം.

പറയാതെ അറിയുന്നുവോ നീ എൻ  പ്രണയം.

*******

ബലിതർപ്പണം.

അകവും പുറവും ഇരുണ്ട പ്രഭാതത്തിൽ

ചാറ്റൽ മഴയും നനഞ്ഞ്,
ബലിതർപ്പണമിടുമെൻപ്രിയതൻ ചാരെ

ഞാനും  വൃഥാ വന്നുനിന്നു.,

തെളിനീരിൽ മുങ്ങിനിവർന്നു കടവത്ത് 

ഈറനണിഞ്ഞവൾ നിൽക്കെ, 

വിറയുന്നതുണ്ടവളിടനെഞ്ചിനകമൊന്നു

പിടയുന്നതും ഞാനറിഞ്ഞു.,

ഇനിയുമാ അമ്മകൈ ഇറുകെ പിടിച്ചി- 

-ന്നൊരടിദൂരം താണ്ടിടാൻ   മാത്രം,   

ഭാഗ്യമുണ്ടായെങ്കിലെന്നു കൊതിച്ചിടാം 

വ്രണിതമാം മനമൊന്നു  വെറുതെ.,

അരുമയായ് കൊത്തിതിരയുന്നൊരു കാക്ക 

പായസ വറ്റുകൾ ദൂരെ, 

അതുനോക്കി നിൽക്കുമവളുടെ മിഴികളിൽ 

ചുടുനീർകണം പൊടിയുന്നു.,

കരയാതെ, നിൻവഴിത്താരയിൽ പിരിയാതെ   

ഞാനുണ്ട് എന്നുമേ കൂടെ,

ഹൃദയത്തിൻ തന്ത്രികൾ മീട്ടുമാ സ്വരരാഗം 

 അറിയാതെ ഞാൻ മൂളിയല്ലോ.,    

ഒരു കുളിർ തെന്നലായവളുടെ മുഖപത്മ-

-മെൻമാറിലതിലോലമമരവെ, 

അകലെയാകാശത്തിരുണ്ടൊരു കോണിലായ്,   

ചിരിയൊളി കണ്ടു ഞാൻ നിന്നു.. 

*******

നീയെന്ന വിസ്മയം..

ഓരോരോ പൂവിതൾ തൂവുന്ന സുസ്മിതം..
ചേർത്തുവച്ചുള്ള നിൻ സ്നേഹമാം ഹാരങ്ങൾ
അണിയുന്നതുണ്ട് ഞാനിപ്പൊഴുമെൻ പ്രിയേ.
അറിയുന്നു നിൻ സ്മൃതി അണയില്ലയുൾപൂവിൽ..

മധുമലർ പാലൊളി തഴുകുന്ന പൗർണ്ണമി-
-തിങ്കൾപോലെൻ നീലവിരിമാറിൽ നീ ചായെ..
അറിയുന്നു മമഹൃത്തിലണയാ വിളക്കിലെ
ഒളിമിന്നുമോർമ്മയാം തിരിനാളമാണു നീ.. 

ഇനിയും മുളക്കാത്ത ഈരില കൂമ്പു പോൽ
ഇനിയൊരു ജന്മത്തിലൊരു മരചില്ലയിൽ
തളിരിടാൻ പ്രണയദലമർമരം തീർത്തിടാൻ
കാത്തു വയ്ക്കുന്നു ഞാൻ നീയെന്ന വിസ്മയം ...

******
ആലാപനം അന്നൂസ് (ഇതിലെ അന്നൂസിന്റെ ബ്ളോഗിൽ പോകാം.)

അറിയാതലിഞ്ഞുപോയ് വിടർന്ന പൂങ്കവിളിതളു-
-കളിൽ നിന്നുടെ പുഞ്ചിരിമലരൊളിയിൽ കുസൃതികളിൽ.,
തെന്നൽ കുളിരലയിൽ അടരും  മഴനീർക്കണമായ്-
-ഞാൻ നിന്നെ പുണരുന്നു മണ്ണിലൊടുങ്ങി മയങ്ങുന്നു....

************

ഭൂതങ്ങൾ..

അമ്മതൻമടിയിലിരുന്നിരുകൈകൂപ്പി
സന്ധ്യക്ക്‌ നാമം ജപിച്ച ദിനങ്ങളിൽ.,
ഇമവെട്ടിടാതെ ഞാൻ മിഴിനട്ടിരുന്നൊരു ,
തിരിനാളമൂതി കെടുത്തുന്നു ഭൂതങ്ങൾ.,

കുഞ്ഞുനാൾ കുഞ്ഞിക്കുറുമ്പുകാട്ടും നേരം .,
അമ്മ പറഞ്ഞതാം കോക്കാച്ചി ഭൂതമൊ..?
രാക്ഷസ ആകാരമുള്ള ദുർഭൂതമൊ..?
ഇന്നുവന്നെവിടെയും ഇരുള് തൂവീടുന്നു..?

മാനത്തിനായ് താണ് കേഴുന്നു നാരിമാർ.,
ആലംബഹീനരായ് മാറുന്നു വൃദ്ധകൾ.,
ബാല്യങ്ങൾ പിച്ചവച്ചീടുന്ന തൊടിയിലും
ലഹരിപൊതിയുമായ് നിൽക്കുന്നു ഭൂതങ്ങൾ.,

കണ്‍കളെൻ അമ്മതൻ കൈകളാലേ മൂടി.,
കണികാണുവാനിന്ന് അടിവച്ചു നീങ്ങവേ.,
മനസ്സിലെ ഇരുളിൽ തെളിയുന്നു രൂപങ്ങൾ.,
മാമരത്തിൽ തൂങ്ങി ആടുന്നു പ്രേതങ്ങൾ.,

ഇരുളാണ് ഭയമാണ് മിഴികൾ തുറക്കുവാൻ.,
ഇരുളിന്റെ മറവിലായ് എവിടെയും ഭൂതങ്ങൾ.,
ഭയമാണ് അമ്മകൈയ്യൊന്നു വിടുവിക്കുവാൻ.,
ഭയമാണ് അമ്മയ്ക്കരികിൽ നിന്നകലുവാൻ.,

മിഴികളിൽനിന്നമ്മ കൈകളെടുക്കേണ്ട.,
ഓട്ടുരുളിയിൽനിന്നുൾക്കണ്ണിൽ വരൂ കണ്ണാ.,
അണയുവാൻ വെമ്പുമീ തരിവെട്ടമകതാരി-
-ലണയാതെയെന്നമ്മകൈകളാൽ കാക്കണേ...

****

മഴക്കുളിര്..

മഴ പെയ്തു മണ്ണ് കുതിർന്നൊരു നേരം,
മനസിലൂടൊരുകൊച്ച് കുളിർകാറ്റ് വീശി.,
ബാല്യത്തിൻ കുസൃതിക്കുറുമ്പോർമ്മ പൂക്കൾ,
തഴുകിവരൂന്നൊരിളം കുളിർ കാറ്റ്.,

മുറ്റത്ത്  മഴയത്തിറങ്ങി നടന്നു,
അങ്ങിങ്ങ് നിറയുന്ന മഴവെള്ളമെല്ലാം,
കുഞ്ഞു പാദങ്ങളാൽ തട്ടിരസിച്ചു.,
കടലാസ് തോണി തുഴഞ്ഞ് കളിച്ചു.,

സ്നേഹം പുരട്ടിയ വാക്കുകൊണ്ടമ്മ,
ശകാരവർഷം ചൊരിയും മുഹൂർത്തം,
ഒരുവേളകൂടി പുനർജനിച്ചീടാൻ,
മഴയും നനഞ്ഞ് നടന്നു ഞാൻ വെറുതെ.,

പുതുമഴ കൊണ്ടൊരീ മണ്ണിൻ മണം പോൽ,
പുതു വസ്ത്രവും പുതു പുസ്തകത്താളും,
പകരുന്ന പരിമളം ഹൃദയത്തിലേറ്റി,
സ്കൂളിന്റെ പടികടന്നെത്തി ഞാൻ വെറുതെ.,

 ഇനിയില്ലിതെല്ലാമൊരോർമകൾ മാത്രം,
നോവുന്ന കുളിരുന്ന ഓർമ്മകൾ  മാത്രം,
മഴമുത്തുകൾ ഉമ്മ വയ്ക്കുമീ മനസ്സിൽ,
പുതുനാമ്പു പോൽ പൊന്തുമോർമ്മകൾ മാത്രം.,

തൊടിയിലെ ചെറുമരക്കൊമ്പിലിരുന്ന്,
വണ്ണാത്തിപുള്ളതിൻ ചിറകുകൾ  കുടയെ,
പൊഴിയുന്ന ജലമണി തുള്ളികൾ വീണെൻ,
മനസ്സിൻ അകത്തളം നനവ് പടർന്നു.,

മഴ പെയ്തു മണ്ണ് കുതിർന്നൊരു നേരം,
മനസിലൂടൊരുകൊച്ച് കുളിർകാറ്റ് വീശി.,
ബാല്യത്തിൻ കുസൃതിക്കുറുമ്പോർമ്മ പൂക്കൾ,
തഴുകിവരൂന്നൊരിളം കുളിർ കാറ്റ്.

*****

പാടിയത് അന്നൂസ്

കാത്തിരിപ്പ്..

മകനെയും കാത്തുകാത്തമ്മ, 

ഉണ്ണാതുറങ്ങാതിരിപ്പൂ, 

ഇനിയും വരാത്തതെന്തുണ്ണീ?

നീയിനിയും വരാത്തതെന്തുണ്ണീ?

ഈ പതിവുള്ളതല്ല്ലല്ലോ

അവനാപത്തിലെങ്ങാനും പെട്ടോ

ഇരുള് പടർന്നേറെ വൈകി

നീയിനിയും വരാത്തതെന്തുണ്ണീ?

തെല്ലൊന്ന് പാതി മയങ്ങും, 

ഞെട്ടിയുണർന്നെത്തി നോക്കും, 

കാതോർത്ത്   ദൂരേക്ക് നോക്കും, 

ഇടനെഞ്ച് പിന്നെയും പിടയും.,

ചങ്ങാതിമാരൊത്ത്  രസമായ്‌, 

നുരയുന്ന മദ്യം നുകരേ,  

ഒർത്തില്ല അവനൊരുനിമിഷം, 

തന്നെ ഒർത്തുരുകും അമ്മമനസ്സ്.,

 ലഹരിതൻ ഉന്മാദ ഭാവം,

ആധിവ്യാധികൾക്കുള്ള കവാടം,

അറിവില്ലകത്ത് ചെന്നെന്നാൽ,

അറിവുള്ളൊരു വിദ്വാനു പോലും.,

രാവിൽ  ഇരുളിൻ മറവിൽ, 

തെരുവോരത്തിലായെവിടേയോ, 

ചോര പുരണ്ടൊരാ ദേഹം, 

പ്രജ്ഞയില്ലാതെ കിടപ്പൂ.,

ലഹരിയിൽ ഉൻമത്തനായി, 

ഇരുചക്ര വണ്ടിയിൽ കയറി, 

പരലോകത്ത് യാത്ര പോകുന്നു, 

മക്കളകലേക്ക് മാഞ്ഞു പോകുന്നു., 

അറിയുന്നതില്ലവരൊന്നും,  

കാത്തിരിക്കുന്നു വീട്ടിലൊരമ്മ, 

നെഞ്ചിലുറയുന്ന വേദന തിന്ന്, 

ഉണ്ണാതുറങ്ങാതെ എന്നും.,

ആറ്റുനോറ്റുണ്ടായതല്ലേ,

അമ്മക്ക് പൊൻവിളക്കല്ലേ,  

അമ്മതൻ സ്വപ്നങ്ങളല്ലേ,

മടിയാതെ വരിക നീ ഉണ്ണീ.,

മകനെയും കാത്തുകാത്തമ്മ, 

ഉണ്ണാതുറങ്ങാതിരിപ്പൂ,

ഇനിയും വരാത്തതെന്തുണ്ണീ?

നീയിനിയും വരാത്തതെന്തുണ്ണീ?

*******

http://kathayillaathe.blogspot.in/2014/05/blog-post.html 

മധുരഗാനം

ഏതോ കുയിൽ പാടുന്നുണ്ടെവിടെയോ,
ഏകനായ്  മാമര ചില്ലയിലെവിടെയോ,
ഇന്നലേയുമിന്നും  കേട്ടു   ഞാനിനി-
- നാളെയും  കാതോർത്തിടാം മധുരഗാനം.,  

 രാവും പകലും മാറുന്നതറിയുന്നുവോ നീ ?
രാവിന്റെ മാറിൽ  തല ചായ്ച്ചുറങ്ങിയോ ?
ഇന്നത്തെ അന്നം തേടി പിടിച്ചുവോ ?
ഒരു മറുപാട്ടിനായ്  കാതൊർക്കുന്നുവോ വൃഥാ ?

ശോകിച്ചിടുന്നു നീയും ഞാനുമെന്തിനോ,
 ശോകമൂകമാകരുതെങ്കിലും   ഹൃദയരാഗം.,
ശോകമെലലാം ഉൾത്തടത്തിലായൊതുങ്ങിടുമ്പോൾ
ബഹീർഗമിക്കുന്നുവോ ഉയരെനിൻ മധുരഗാനം ?.

ഏതോ കുയിൽ പാടുന്നുണ്ടെവിടെയോ
ഏകനായ്  മാമര ചില്ലയിലെവിടെയോ
ഇന്നലേയുമിന്നും  കേട്ടു   ഞാനിനി-
- നാളെയും  കാതോർത്തിടാം മധുരഗാനം. 

***********




  

പൂവ്

ഇരുളു  തുരന്നു വരുന്നേ  പൂവ് 

ഇരുളിനകത്ത്   മറഞ്ഞേ പൂവ് 

ഇരുളും വെട്ടവുമിടചേർന്നങ്ങനെ 

ഇരുകര താണ്ടി നടപ്പൂ ഞാനും. 

*******

കഥയില്ലാതെ എന്ന ബ്ലോഗിലെ പുതിയ പോസ്റ്റിലേക്കുള്ള ലിങ്ക് 

http://kathayillaathe.blogspot.in/2013/10/blog-post_18.html

കൊതുക്

അന്തമില്ലാ രാത്രിയിലിലെൻ 

ചിന്താശൂന്യ മണ്ഡലങ്ങളിൽ 

ഒന്നുരണ്ടല്ലായിരങ്ങൾ 

കുന്തമുനയായ് ഓടിയെത്തും 

ചോരയൂറ്റി എടുത്ത് പിന്നെ

മൂളിയങ്ങ് പറന്നുപോകും

രണ്ടു നാളല്ലേറെനാളായി

വന്നു കൂടിയ ദ്രോഹമല്ലോ 

ഉള്ളിലുള്ളൊരു തുള്ളി അലിവാൽ 

വേണ്ട വേണ്ടായെന്ന് വയ്ക്കേ 

ഇല്ല ഇനി ഒരു രക്ഷ എന്നാൽ 

നിദ്രവിട്ടൊരു സിംഹമായ് ഞാൻ 

ഇന്ന് തന്നെ ഉയർത്തെണീക്കും 

ഇന്ന്‌ രാവിലുറക്കമില്ലാ 

യുദ്ധമല്ലോ ഘോര യുദ്ധം 

ഒന്നുമൊന്നും ബാക്കിയില്ലാ- 

-തൊന്നൊന്നായ്‌ ചതഞ്ഞരയും 

എട്ട് ദിക്കും കാണുമാറെൻ 

വിജയകൊടിയീ വാനിലുയരും

*******

ഞാൻ എന്നത് ഈ ലോകമാണ്. എന്റെ ചിന്താ ശൂന്യമായ പ്രദേശങ്ങളിൽ  ഒരുപാടുണ്ട് ഇതുപോലെ പതിയിരുന്നു   ദ്രോഹം ചെയ്യുന്ന  കൊതുകുകളെപോലെഉള്ള ദുർഭൂതങ്ങൾ...സമാധാനം തരാതെ...

തുമ്പക്കുടം

മാബലിതമ്പുരാൻ വന്നുവല്ലോ 

പൊൻ തിരുവോണവും വന്നുവല്ലോ

ചെത്തി മിനുക്കിയ മതിലരികിൽ

കൊച്ചിളം തുമ്പക്കുടം ചിരിപ്പൂ

കണ്ടില്ല  കൈക്കോട്ടിൻ തുമ്പിതിനെ 

ഭൂമി മാതാവൊളിപ്പിച്ചു വച്ചു

കാണാതെ മാറോടു ചേർത്തുവച്ചു

താരാട്ട് പാടി മാമൂട്ടി വച്ചു.

പൊന്നോണ പൊൻവെയിൽ കാഞ്ഞുകൊണ്ട്

കൊച്ചരി പല്ല് പുറത്ത് കാട്ടി

പഞ്ചാര പുഞ്ചിരി തൂകിടുന്നു  

അമ്മതൻ കരളിൽ കളിചിടുന്നു

ഈ കൊച്ചു ചെടിതൻ കവിളിലല്ലോ

പോന്നോണ തുമ്പി വന്നുമ്മവയ്പ്പൂ 

ഈ കൊച്ചു ചെടിതൻ തലപ്പിലല്ലോ

ഭൂമി മാതാവിന്നൊരോണമുള്ളു

ഈ നിഷ്കളങ്കയാം പുൽ ചെടിയായി

ഞാനു മൊരു വേള മാറിയെങ്കിൽ

ആരാരും കാണാതെൻ അമ്മയുടെ

മാറത്ത് തലചായ്ച്ചുറങ്ങിയെങ്കിൽ.
*********

http://kathayillaathe.blogspot.in/

മനസ്സിലെ ഓണം.

എന്തെല്ലാം ഏതെല്ലാം  മാറിയാലും, 

മനസ്സിലെ മലയാളം മായുകില്ല., 

ഒരു നല്ലൊരോണ പൂക്കളമൊരുക്കാന്‍,  

ഒരു പിടി തുമ്പപൂ  ചോറൊരുക്കാന്‍, 

തൈമാവിന്‍ കൊമ്പിലൂഞ്ഞാല് കെട്ടാന്‍,

കൈകൊട്ടി പാടുവാന്‍ കുരവയിടാന്‍,  

മനസ്സിനകത്തൊരു ഓണമുണ്ട്., 

ഓർമ്മകൾ ചാലിച്ചൊരോണമുണ്ട്., 

ആ നല്ല തറവാടിൻ തിരുമുറ്റത്ത്, 

പോന്നോണ തുമ്പിയായ് ഞാനിരിപ്പൂ, 

കണ്ണിമ പൂട്ടി ഞാൻ കാത്തിരിപ്പൂ, 

പോരുക പോരുക മാവേലിയെ,

പോരുക പോരുക മാവേലിയെ.

ആർപ്പോ..ഈറോ..ഈറോ...ഈറോ..

ആർപ്പോ..ഈറോ..ഈറോ...ഈറോ..

******

http://kathayillaathe.blogspot.in/

ഓർമ്മകൾ

ഒരു പനിനീർ പൂവിതളിൽ

പതിയുമീറൻ തുള്ളി പോലെ

ചിതറിയെൻ അകതാരിൽ മെല്ലെ

കുളിരു ചൊരിയുമൊരോർമ പോലെ

കരിമിഴിയിണ പറയുമോരോ

പരിഭവ തേൻ മധുര മൊഴികൾ

മൃദുലമാം ചെഞ്ചുണ്ടിലരുണിമ

വിടരുമാ സായന്തനങ്ങൾ

മഴ നനഞ്ഞു കുതിർന്ന മണ്ണിൽ

ഇളവെയിൽ പടരുന്നു മെല്ലെ

തരളമെൻ ഹൃദയം തുടിപ്പൂ

തഴുകി അണയുമൊരോർമ പോലെ

മനസ്സ് കടലായ്മാറി ഇളകി

സ്മൃതി തിരപോൽ ബാക്കിയായി

ദൂരെ മാഞ്ഞു മറഞ്ഞു പോയീ

സ്നേഹമായ പ്രഭാമയൂഖം.

**********

പൂത്തുമ്പി

തങ്കവർണ്ണ കണിപൂങ്കുലകൾ തോറും,
തത്തി കളിക്കുന്ന പുലരിതൻ കനലൊളി,
കണികണ്ടു കണ്‍ തുറന്നീടുവാൻ ഉറങ്ങുക
കനവിലെ പൂഞ്ചില്ലയിൽ വന്ന പൂത്തുമ്പി.

താമര പൂന്തണ്ടുലയുമ്പോൾ ഇളകുന്ന
ചെന്തളിർ ഇതളുപോൽ ചിറകുള്ള പൂത്തുമ്പി
തുമ്പ കുടത്തിന്റെ തുഞ്ചത്ത് ചുംബിച്ച്
തുള്ളി തുളുമ്പി തിളങ്ങുന്ന പൂത്തുമ്പി

മന്ദാര പൂവിതൾ വിടരുന്ന പോലെ
നിലാവ് പടർന്നു നിറയുന്ന പോലെ
നിദ്രയിൽ നിൻ നീല നയനങ്ങൾ കൂമ്പുംപോൾ
കിനാവ്‌ തെളിഞ്ഞു വരട്ടെ
മധുരക്കിനാവ്‌ തെളിഞ്ഞു വരട്ടെ.